Number do....

number do se apna jaane kya ajeeb sa nata hai,
ek ko haasil karne niklo to haath mein do hi aata hai....

bade bhai ne janam hote hi duji santaan banaya,
do number se paise dekar birth certificate aaya....

class mein cheating karte jab master jee ne pakda,
do numberi kehkar jabran mera color jakda....

baharwee to jaise taise pass bhi karke aaya,
IIT ki preparation ne fir 2 saal rukwaya....

college mein aate hi sar pe chadha pyar ka bhoot,
2 ladki ke chakkar mein padke khaaye bharpet joot....

2 number ka fer agar tab hi buddhi mein aata,
2 number ka kaam koi karta aur khub kamata....

par kismat ki to lag gayi yaaron jab IT mein aaya,
number 1 ki job mein bhi na 2 se mukti paya....

2 saal parishram karke rating ki lag gayi race,
manager bola mujhse 'arjun, you are exceptional case'....

man hi man muskata main jab pahucha apne flat,
rote roomie ko dekhkar laga zara setback....

poochha yaaro kya hai duvidha, kyun ho yun bechain,
subuk subuk kar bola wo rating 2 ne diya ye pain....

hausla dekar usko bola yaar aisa hi hai jeevan,
aur man hi man socha 'sale aalsi, tujhe hi to milega one'....

manager ki baat abhi bhi kaano mein thi mishrit,
exceptional hun sochke jaagi mann mein one ki hasrat....

agle din jab office pahucha, saamne 2 ka danda paya,
dil ke tukde ho gaye 2, sham ko theke pe adda jamaya....

2 peg utaar ke fir 2 gali bak di back to back,
2 pal ka rona aur fir life back on track.......

Rooh mein daakhil....

bheed anjaano ki hai
koi mehfil to nahi

panaah yaado me mile
iske kaabil to nahi

masla-e-ishq hai
karein shikwa kaise

sabab ashko ka sirf
dard-e-dil to nahi

thaam ke baithe hain 

beete lamhe kyu

zakhm kuredne se 

kuchh haasil to nahi

aankh ka paani hai 

ya samandar hai

doobte jaate hain 

ki iska koi saahil to nahi

naam dosto me na shumaar 

to na hi sahi

shukra karte hai 

gairo ki fehrist mein shaamil to nahi

bedakhal zindagi se 

karne ka daawa karte hain

gaur se dekho 

kahin rooh me hum daakhil to nahi

Daulat, shohrat aur pyar

3 dost the, daulat shohrat aur pyar
unko ek bachchi mili, masoom, nadaan is duniya ke riwazo se anjaan, bachchi ro rahi thi, bhooki thi shayad,  tabhi palke bhigo rahi thi, 3 dosto ko laga iska kuchh khayal kare, par ye to bachchi hai bhala isse kya sawaal kare, tabhi shohrat bola ki isko yahan chhor gayi wo maa bhi kitni kroor hogi, par yakeen hai mujhe jaanti zarur hogi, agar hum pata laga le ki kaun hain iske maa baap to apne naam ka waasta dekar unko samjha sakta hun ki kyu kar rahe ho ye paap, ye sunke daulat bhi chup na raha, aur iske jawab mei usne bhi kaha, ki maa baap ka thikana nahi to na hi sahi, ye bachchi kisi aisho aram se vanchit reh na jaaye kahi, iski zindagi main khushio se bhar dunga aur saare sukh isko nazar kar dunga, par pata to chale ki isko chaahat hai kiski, kya pareshani hai kya raahat hai iski, pyar bechara chup chap khada tha, rutbe me shohrat aur rupye me daulat usse bada tha, par pyar to aakhir pyar hi hota hai, aankhe nam hoti hai uski jab koi bhi rota hai, bina soche aafato se ulajh jata hai, aur bina kuchh bole dil ki baat samajh jata hai, pyar gaya aur doodh leke aaya, bhooki bachchi ko god mei uthaya gale se lagaya aur doodh pilaya, doodh peete peete bachchi shaant ho gayi so gayi, uski tamaam pareshaniya pyar milte hi jaise kho gayi

Aaj fir....

Aaj fir kisi bachche ko zid karte dekha

Aaj fir khud ke bade hone pe malaal huya

Aaj fir dil ki sunne ki tamanna jaagi

Aaj fir us tamanna ka inteqaal huya

Aaj fir socha kuchh na sochu

Aaj fir iske anjaam ka khayal huya

Aaj fir beparwah hona chahaa

Aaj fir zamane ka mujhse sawaal huya

Aaj fir koi bewkoofi karne chala

Aaj fir maskharo sa haal huya

Aaj fir khwabo ke sikke batorne baitha

Aaj fir toote bikhre khwabo se kangaal huya

Aaj fir aankhein band kar dekhne ki koshish ki

Aaj fir berehem thokaro se badhaal huya

Aaj fir........

Sarfaraaz....

guftgoo ke aakhir ye
kya andaaz ho gaye
hotho se kya laga li, 
nashebaaz ho gaye....

unke husn ke deewane 
to aur bhi kayi the
fir kyun wo sirf humse 
hi naraz ho gaye....

jab zikr-e-mohabbat utha 
anjaano ki mehfil mein
tab ajnabi bhi dard ke 
humraaz ho gaye....

maslaa-e-ishq hai, 
karein aitbaar kiska
khoon ke rishte bhi 
dagabaaz ho gaye....

kuchh aise manaya, 
jashn-e-shikhast apna
deewano ke sheher ke 
sarfaraaz ho gaye....

Meri hasrat ke gubbare....

Tequilla shot lagti hai

Bhayankar hot lagti hai

Jo muskaaye gazab dhaaye

Tu maal ek tot lagti hai

Yu gulchharre udaane ko 

bahut hain laundiya lekin

Har ek ladka tujhe chahe

Tu best of lot lagti hai

Tere latke tere jhatke

Tu jis andaaz se matke

Tere jhumke tere thumke mein

Sabke dil rahein atke

Tatpar jaan lutaane ko 

Gali ke hain sabhi launde

Tujhse jo nazar uljhe

Nazar wo raah se bhatke

Tu soto ko jagati hai

Tu roto ko hasati hai

Nazar bharke agar dekhe

To rootho ko manati hai

Tere dil ke khilone hain

Meri hasrat ke gubbare

Ki ek pal mein fulati hai

Aur ek pal fod jati hai....

Kahi Ankahi

chhupana chahu bhi to kaise, chhupane ko raaz nahin milte
anjam to haasil kar bhi lun, par un tak jane ke aaghaaz nahin milte
kaise karun shumaar ek sher mein meyaar-e-mohabbat
ki isko to bayaan karne ko alfaaz nahin milte


 
zubaan taqreer kho baithi, ye dil hairan ho baitha,
tere is husn ke jalwe pe main qurban ho baitha,
ye charcha aam hai lekin zara si khaas bhi to hai,
ki kyun is ishq ke masle mein apni jaan kho baitha........


 
haathon ki lakeero se, muqaddar na ban saka
jo khwab mein mila tha, haqeeqat na ban saka
aansoo bhi sookhkar ab to ruk se hi gaye
mere hi dil mein kyun gulnuma manzar na ban saka


 
majbooriyon ko aksar aadat bante dekha hai
kamzoriyon ko aksar himmat bante dekha hai
nazar nazar ka fer hai warna kya main aur kya tu
har kisike haath mein kismat ki rekha hai....


 
har ek subah ki yahan shaam huyi hai
kuchh hasratein hi bas be-lagam huyi hai
hum mehnat kar mar chale pichhle saal
par lagta hai pichhle saal to bas, sheila jawan aur munni badnaam huyi hai